بیر پادشاه اوز وزیرینی ئوز یرینه قویوب ، او بیری وزیری ایله تغییر لباس اولوب ئولكه نی گزمگه چیخیر . ایكیسی ده درویش پالتاری گئیینیرلر كه اونلاری تانییان اولماسین .
شاه وزیری ایله آز گدیر چوخ گئدییر یولدا بیر كیشیه راست گلیر. كیشی ایله سلاملاشیب باشلاییرلر گئتمگه ، گورور كه كیشی ده اونلارلا گئدیر . اودور كه دئییر: – كیشی ایندی كه ، بیر یئرده گئدیریك گل یولا نردبان سالاق . كیشی دئییر: – درویش بابا ، بو یكه لیده یولا دا نردبان سالماق اولارمی ؟ شاه كورور كه ، كیشی اونون سوزینی باشا دوشمه دی . داها اوستونی وورمور . بونلار گئدیب بیر شهره چاتیرلار . كیشی دئییر : – درویش بابا بورا بیزیم شهریمیزدیر . ایندی من گئدیرم ائویمیزه . شاه دئییر : قارداش بیزی بیر گئجه لیكه آللاه قوناغی ساخلارسانمی ؟ كیشی مسجدی گوستریر كه ، آللاه قوناغی اورا گئدیر . كیشی اونلاردان آیریلیب گلیر ائوینه . یولداكی احوالاتی قیزینا سویله ییر .